ආහාර වේලකට පසු අතුරුපස ගැනීම සුදුසුද?

අප ප්‍රධාන ආහාර වේලට පසු අතුරුපසක්, රස කැවිලි නැතහොත් සීනි ස්වල්පයක් කෑමට හුරු වී සිටිමු.

එපමණක් නොව ඇතැම් විට අපි රස කැවිලි ටිකක් ඉතිරි කර ගෙන පසුව සෙමෙන් තළු මරමින් රස බැලීමට පුරුදු වී සිටිමු. අප ආහාරයට පසු අතුරුපස ලබා ගත යුත්තේ කවර හේතු නිසා කීර්තිමත් ආහාර පිළිබඳ විශේෂඥයකු මෙන්ම තරබාරුකම පිළිබඳ උපදේශයකයකු වන නායිනි සෙටල්වඩ්ගෙන් විමසා මිටියෙමු. ඇගේ පිළිතුරෙන් මම කම්පනයට පත්වීමි. (ඔබ ද කම්පනයට පත් වනු ඇත) ඇයට කීමට ඇති දේ මෙසේය.

නායිනි සෙටල්වඩ් පවසන පරිදි ආහාර වේලකට පසු පැණි රස කෑමට ගැනීම සෞඛ්‍යයට හිතකර නැත. එය ඔබේ රුධිරුයේ සීනි මට්ටම ඉහළ දමනවා පමණක් නොව ඔබ තරබාරු වීමට ඇති අවදානම ඉහළ දමන අතර වෙනත් සෞඛ්‍ය ගැටලු ඇති වීමට ද හේතු වෙයි. ඒ ඔබේ ආහාර වේලේ ප්‍රධාන කොටස වන ධාන්‍ය එනම් බත්, පාන් ආදි තිරිඟු ආහාර සහ පරිප්පු ආදීයෙහි ද සීනි අඩංගු නිසාය. ඔබේ දවසේ සීනි අවශ්‍යතා ඔබ ආහාරයට ගත් එම කෑමවලින් සපුරයි. ඊට අමතරව අතුරුපස ලෙස රස කැවිලි ආදිය ගැනීම නිසා කෑමට පසු ඔබේ රුධිරයේ සීනි මට්ටම ඉහළ යයි. හදිසියේ ඉහළ යන සීනි මට්ටම සිරුරේ ප්‍රතිශක්තිය පහළ දමන අතර දියවැඩියාව, තරබාරුකම, වකුගඩු රෝග සහ හදවත් රෝග වැනි අපේ ජීවන රටාව නිසා හටගන්නා රෝග වැළඳීමේ අවදානම ඉහළ නංවයි.

රස කැවිලි කෑමට හොඳම වෙලාව කුමක් ද?

ප්‍රධාන ආහාර වේලට අනතුරුව අතුරුපස ගැනීම නුදුසුසු නැත. එසේම පැණි රස ලබා ගැනීමේ හොඳම මූලාශ්‍රය පළතුරුය. ආහාර වේලක් ගත් වහා පැණි රස කෑම සුදුසු නැති අතර ප්‍රධාන ආහාර වේල් දෙකක් අතරතුර අතුරුපස හෝ පැණි රස ආහාරයට ගැනීමට වඩාත් සුදුසුය. ඒ පැණි රස ක්ෂණිකව ශක්තිය ලබා දෙන නිසාය. රුධිරයේ ග්ලූකෝස් මට්ටම මදක්වත් පහත වැටීමට ඉඩ නොදෙන නිසාය. එහෙත් ප්‍රධාන ආහාර වේල් දෙකක් අතර එනම් ආහාර වේලකට පැය කිහිපයකට පසු අතුරුපස ලෙස පැණි රස කෑම ගැනීම නිසා ආහර වෙලක් ගත් වහා අතුරුපස ගැනීමේදී මෙන් එකවර රුධිරයේ ග්ලූකෝස් මට්ටම ඉහළ නංවන්නේ නැත.

“ඔබ සීනි, මේද, ප්‍රෝටීන්, කාබෝහයිඩ්‍රේට් අඩංගු සමබල ආහාර වේලක් ගත්තේ නම් ඊට පසු කිසිදු පැණි රස ආහාරයක් නොගන්නා ලෙස මම ඔබට අවවාද කරනවා” යැයි නායිනි පවසයි. ඔබ දිගුකාලයක් තිස්සේ ආහාර වේලට පසු පැණි රස කෑමට පුරුදු වී සිටියේ නම් එය සෙමෙන් අඩු කර පැණි රස වෙනුවට පළතුරු කෑමට පුරුදු වන්න. මුල් දින කිහිපය තුළ ඔබට පැණි රසට ඇති ගිජුකම නිසා යම් අපහසුතාවක් ඇති විය හැකිය. එහෙත් කාලයත් සමග ඔබේ සිරුර රස කැවිලි වෙනුවට පළතුරු සහ වෙනත් විකල්පවලට හුරු වනු ඇත. අනතුරුව කෑම වේල සහ අතුරුපස අතර කාල පරතරය වැඩි කරගන්න.

එහෙයින් ආහාරයට පසු අයිස්ක්‍රීම්, පුඩිං, වටලප්පන් ඇතුළු නා නා මාදිලියේ රස කැවිලි වර්ග ආහාරයට ගැනීමට පෙර දෙවරක් සිතන්න.

(www.thehealthsite.comහි Is it healthy to eat sweets after meals? නම් ලිපියෙහි සිංහල අනුවාදයකි.)